2Cor 3 | GAM | STEP | Kandja embe dje aunmon ge ye no kogo wopake yenmon we dje piye dje nayenmon, man. Mo una pende molo una mor al dje auneke ga pepa bolo no kogo wopake yenmon we dje boye ge, no pepa embe mal i ye aumbonaka ye no kogo wopake yenmon we dje ye piye mo? Ge man. Mo no ye mor al wo djimbonka, ye no pepa bolo awo embe djine no kogo wopake yenj we dje bolo auneke no ipo tabye ta ombine dje aumbonka una no kogo wopake yenmon we dje piye mo? Man kaima.

2 Corinthians 3

God gopa gun to awi mal aposel kogo ye wanij

1 Kandja embe dje aunmon ge ye no kogo wopake yenmon we dje piye dje nayenmon, man. Mo una pende molo una mor al dje auneke ga pepa bolo no kogo wopake yenmon we dje boye ge, no pepa embe mal i ye aumbonaka ye no kogo wopake yenmon we dje ye piye mo? Ge man. Mo no ye mor al wo djimbonka, ye no pepa bolo awo embe djine no kogo wopake yenj we dje bolo auneke no ipo tabye ta ombine dje aumbonka una no kogo wopake yenmon we dje piye mo? Man kaima. 2 Ye no pepane mor. No djipinka ye Krais boll pillgi dji mal ge, ye no tukne al pepa mal boi mor. Una porapora pille kane ye, kere kanne kune yenda. 3 Krais pepa bolo awi ge, ye pepa mor, una kere kanne kune yendo. No kogo yepin al Krais pepa ge boi. Ba Krais pepa boi ge mon naboi; une God gun moi una Murble boi. Ku al naboi, ye tukne al boi.

4 Krais embe yeika ye pillgi dji al ge, una kanne, no kogo ye boll yepin ge megye toi dje no God boll pillgi kaima djimon. 5 No kogo wopake yepin al ge ye mor we nadjimon, man; God taimane ye wori ye mor. Wal yembon dje yenmon ge God aunda yenmon. 6 God gopa gun ta toi ge, no una dje aumbon kune nayei ba yene awi al no po una dje aunmon. Gopa toi ge pepa al naboi, God Murble boi. Lo kandja pepa al pai ge ye molo una to goi. Ba God Murble ge worika una er wo gun pi.

7 Ye pillme! Asa lo ku al bolo pagi ge ye molo una to goi ba pagi al ge talang kerman yeika Mosis gume djillake al killakilla ye pai. Pa wo kembis pi ba Israel una nalene al kanbon dje yei kubill kabill yei. 8 Ba ipon God Murble nono boll kogo yendo ge er welke po au dje er kerman ke pundo. 9 Mosis lo dje awi talang ye pai ba, God ye wambo paro we dji. Ba alla ipon nono Krais kogo yei al ge, nono ale naparo, God nale al kiwa mormon. Kandja embe paro ge talang kerman ye er welke kaima pundo. 10 Mosis lo ge talang ye pai ba ipon God kandjiye wopake talang ye pa wo er welke po paro pille, Mosis loye talang ye pai ge ye napai mal yendo. 11 Asa Mosis loye talang boll woi ge pora djinda pai. Ba Krais kandjiye pora nadjinda pai pille talang ye woi ge wo er kerman pi.

12 Embe yei pille, wal kerman ke pa wo er welke kaima pundo ge no pillgi dje kwi ye mormon pille, kand nagormon, man; kandja ge dje una aunmon. 13 Mosis gume djillake talang ye pa er wo kembis pi ge, Israel una kane djine dje pille allap i gume djillake to bi dji. Ba Mosis yei mal ge, no nayenmon. 14 Alla Israel una nomane al pille ine napai. Ipon Mosis loye kere pir ge allap mal i gumane djillakene to pel ye paro. Allap ge pa moro. Krais boll taimane pillgi dji dal, God allap i worda. 15 Mosis loye kere pir ge, allap i nomane al to pel ye paro. Asa to pel dje pagi mal ge, pa woi, ipon pa moro. 16 Ba alla una nomane ake to Iwa Kerman boll pillgi dji dal, God allap i woro aunda. 17 Na Iwa Kerman we djindo ge na God Murble pille djindo. God Murble moya al ge, una kaye napane, kiwa moye. 18 Alla nono gumane djillakene al allap naparo una porapora mormon ge, Iwa Kerman yene talangye ge no boll pa poll dje yem wordaka una kaninj. Iwa Kerman Murble ege ege talang ye paro ge nono boll yake kerman po pa molo i gun wordaka yene moro mal embe molo pa bon.